الامثال الكويتية

[ام عبدالله العوضي]

يقولون تمره مايلحسها اللاحوس .... يعني واحد مايضره شي ابد دائما ينجو من المصايب ....
مارد الكلب على قصابه ..... يعني راح يرجع ولو بعد حين وتحتاج لي ...
ذرو بعيونه رماد ... عن الحاسد
تيس تيس .... بكسر التاء والياء والسكت عند السين وهي تقال لتشابه الاشياء مثل بعض ..... هذا الشي يشابه ذاك
الشيم ماكول الحشيم .... عن سمك الشيم
حومه ماكوله ومذمومه ......
طوفه هبيطه ....
لجعه الدهر تلجيع .... ذاق الويل من البلاوي في زمانه
فلانه حيه رقطاء ......يعني يقصد فيها المراه الخبيثه
يربط عصائص يعني اللي يثر المشاكل باتاره ناس على ناس يحرش بينهم يعني ..
يقولون اذا دلق سهيل لاتامن السيل وسهيل هو نجم يضهر بوقت معين من السنه تقريبا شهر 9 ويكون اذا دلق على رطوبه يكون مطر وخير ووسم
واذا دلق على جفاف يكون الشتا بارد سحتني ..
شوشه ضايعه .... اي ليس لهم ولي يتحكم فيهم كل شوره بيده ويمشي على هواه..
خمة البقعه ... تطلع على المجموعه الصايعه غالبا من الشباب ...
اللي ماعنده زبيل يشيل بشليله .. يعني اللي ماعنده سله يشل فيها اغراضه يشيل الاغارض بملابسه يرفعها ويعملها مثل الكيس ويحط اغراضه فيها...
وكل مايطري على بالي شي احاول اكتبه باذن الله
وعساني بس اكتبه عدل ..... جود اني اتذكر وافيد واستفيد .....
يقولون ياغالي والطلب همبه ..
يقولون بعد من تغلى يخلى ...
لاتكثر الدوس ياخلي يملونك لانت بولدهم ولا طفل يربونك ...