اليوم بنسوي خثره
السلام عليكم ...
اليوم بنسوي خــثره وهي من الأكلات الكويتيه القديمه ما قبل النفط وهي عباره عن مرق سمج وعيش .. عاد الكويتين الأوليين يحبون هالأكله وخصوصاً الشياب والعيايز لأنها تنزلط زلاط . بسم الله بدينا وعلى النبي صلينا جيلتين عيش مغسول عدل ونقعه بالماي ونخليه على كتر (على جنب) وبعدين نبدي بالمرق ... انيب زبيديه بس من الحبات الوسط أحلى حق المرق نغسلهم عدل ونفركهم بالملح والكركم وشوي كمون .. ونخليهم على كتر طبعاً تعرفون طريقة المرقه .. بس ألحين بقولها بشكل سريع 3 بصلات قص نعيم - 4 طماطات قص نعيم - معجون طماط قوطي واحد لومي أسود مطحون ولوميه وحده عدله بس نقضها - 4فصوص ثوم مدقوق بهارات سمج وكركم وكمون وزنجبيل طري شويه بس(اضافه من عندي) وكزبره ناشفه مطحونه وقفشتين صباره وطبعاً وملح وماي حق المرقه ... نحمس البصل والثوم والزنجبيل بشوي ماي لين ينشف ويذوب البصل ، وبعدين الطماط الطري ودهن (السمن أطيب من الزيت وأقصد سمنه نباتي علشان صحتكم وشراينكم ) ... ونحمس لين يذوب الطماط عدل عدل (لاتستعيلون) ، وبعدها نحط البهار ومعجون الطماط (ونحمس )ونحط السمجه أنا ما أحط الراس وهذا على كيفكم (طبعا مغسوله من الكركم والملح) وقطعوها وصلتين إذا تبون أو تخلونها تذوب بالمرق كيفكم .. تقلبووون السمج لين يشرب شوي من الحمسه وتحطون اللوميه المقضوضه وبعدين تحطون العيش المغسول (كل مانقع العيش أكثر صارت الخثره طيبه) وبعدين تصبون الماي عليها يكون مستوى الماي فوق العيش بأربع أصابع ،،تطبخ شوي وتشوفون الماي شوي قصر ،، وبعدين تحطين الصباره المنقوعه بالماي من وقت،،وتملحون المخثره حسب ذوقكم بمكيال الملح ،، وتحطون تحت الجدر حديده وتقصرون عالجوله وتخلون الخـــثره تخدر مو أقل من نصصصص ساعه بس نقلب الجدرعلشان نتأكد ما ايحترق إللي بقاع الجدر. ملاحظه مهمه جداً: كل ماكانت الحمسه متعوب عليها طلعت الخثره ممتازه ولا تنسون الوقت إللي تخدر فيه الطبخه ،، مايحتاي أقولكم بعد... يلعب دور بالطعم . وبعدين على كتر أنتي مقطعه البصل جوانح وتقلينه بالدهن لين يصير لونه أدعم - بني (حق الحشو وقت النجاب) وزهبو الرويد والبقل والجرجير وأجار الطماطه وبالعافيه إن شاء الله ... |
مشاركة
اقتباس:
تقبلوا تحياتي . |
اقتباس:
بس اللي راح يجرب هالطريقة -اللي بالاقتباس السابق- بيلاحظ ان الطعم مو حالي مثل ما يتوقع!!>> يعني انا اسوي العصيدة السكر المضاف يوازي الطحين الاسمر المضاف.. يعني>> مكتوب بالاقتباس السابق>> 1 كأس طحين اسمر و 2/1 كأس سكر،>> لكن طريقتي تكون نفس الفكرة و لكن مثل ما بينت السكر يوازي الطحين>> يعني 1 كأس طحين اسمر ، و 1 كأس سكر >> و طبعا يعتمد على الكمية لكن حبيت اشير ان الطريقة الاحلى ان السكر يوازي الطحين بالكمية . لكن بعد ما تخلص و نحطها بالصحن و تجهز ضروري الفلفل الاسود الناعم فوق العصيدة و قبلها طبعا الدهن العداني او السمنة -في ناس يستبدلونه بالزبدة السايحة العادية>> لكن للامانة انا ما افضلها لان الطبق جذي بيكون زفر:mad: - وانا نفسي شينة على قولة القايل :D >> طفارتي الزفرة بالاكل.. ف يفضل السمنة>> الدهن العداني . و بالعافية و تستاهلون . :) |
الساعة الآن 02:14 AM. |
Powered by vBulletin® Version 3.8.7, Copyright ©2000 - 2024
جميع الحقوق محفوظة لموقع تاريخ الكويت