الشاعر مسلم حميد البحيري

[كويتى مخضرم]

(( 9 ))



حل الفراق وباح ماكـان كنيـت
وضاق الحشى مما جرى وستلجي
لهموم قلبي تسعه وتسعين عديت
قامت تصافق فيه من كـل فجـي
مافادني كثر المنى لـو تمنيـت
ولا فاد بالمجمول كثـر الترجـي
صار الجزا عقب الولافه تفاخيت
ولا عاد تنفع بالحبيّـب أحججـي
عزم على رايـه وقفـا وتميـت
في موقفي وزريت أسنع مدجـي
وعوت أجاهد عبرتي والتناهيـت
لولا ضلوع خطر قلبـي يهجـي
أفكر وقول الخاطري ليت ياليـت
ياليت قلبي عن هواهـم يسجـي

[كويتى مخضرم]

(( 10 ))



ياشوق ماغيرك حبيـبٍ يسلـي
لو خيروني في جميع البناتـي
أفز طولي من مكانـي وهلـي
ياشفت زولك مقبـلٍ ياحياتـي
ياشوق ماغيرك مناي أو دواً لي
حيث أن حسنك كاملٍ بالصفاتي
زين ودلال وقد وعيونـك الـي
تجرح وتذبح قبل يوم المماتـي
ياشوق دامك بالهوى صافي ٍ لي
مالي نضر بالبيض حبك ثباتـي
وعيني عليك وخاطري مايملـي
لا غيـر الله نيـة المقبـلاتـي

[كويتى مخضرم]

(( 11 ))



يانور عيني ماتفيد التحاسيـف
ياصارت الفرقى طويلٍ مداهـا
الي كتب باللوح مافيه تحريف
والعاقل الي قدرت الله رضاهـا
بالك يجن أدموع عينك ذواريف
العين جاها من السهر ماكفاها
والله ماقصرت ياغاية الكيـف
مير الليالي قصرت في وفاهـا
لاتحسب الدنيا تجي دايم أبريف
كلٍ يموت وحاجنـه ماقضاهـا

[كويتى مخضرم]

(( 12 ))



ألا يـا ناشـدٍ وشلـون حالـي
وانا أدري وش مرامك من سؤالي
تمهل ليـن أكمـل لـك جوابـي
مدام الجـو يـا النشـاد خالـي
وخذ من راس من تنشد علومـه
ماهو قولت يقـال أفـلان قالـي
أنـا ياناشـدي مانيـب مثلـك
ولا فاجـاك ربـع الـي جرالـي
تعكر مشربٍ لـي كـان صافـي
وعاكسني زمـانٍ كـد صفالـي
وخلانـي سهيـرٍ طـول ليلـي
أسامر طيف خلـي فـي خيالـي
أهيـم أبذكريـات الأمـس دايـم
واسلي خاطـري طـول الليالـي
لاجل ماعاد لـي غيـر التذكـر
سقـاك الله ياوقـتٍ مضـالـي

[كويتى مخضرم]

(( 13 ))



يازريف الطول بسـك لاتجـخ
أرحم الي صـار بيدينـك دواه
في بحركم مركبي شال و شدخ
لين عال الموج ياخلي كسـاه
غرق السنبوك والبيص أنشلخ
والنويتش تالي الزهبـه كـلاه
ولاث بي الموج في سيفٍ صبخ
لا طروشٍ توصل ولا من مياه
مارحمت القلب يوم إنه كفـخ
مثل كفخ الريح بشـراعٍ فـراه
ماهو حقٍ منك يوم أنه رسـخ
في ضميري حبك أتجدد عنـاه
الغلى مغليك وان كانـه طـرخ
بيرقٍ لك غيرنا شاقـك هـواه
نبندوس النفس لو قلبي صرخ
عشرةٍ هالـون مافيهـا حـلاه

[كويتى مخضرم]

(( 14 ))



شاقني غروٍ من البيض محسوبي
كاملٍ زينه وفـي هرجـه ذرابـه
غصن موزٍ مانقطع عنه الشروبي
مستكن ومن نهر دجلـه شرابـه
الحشا ملهوف ونهوده نصوبـي
تشتكي من زمت أنهـوده ثيابـه
العيون الخرس يايوسف سطوبي
والحواجب كنهن ريشـة غرابـه
وكن لون أخدودها شمس الغروبي
أو كمـا جمـرٍ تزايـد بالتهابـه
من تولع فـي هواهـا مايتوبـي
وعزتيله من جفاها من صوابـه

[كويتى مخضرم]

((15 ))

البارحـه قلبـي تزايـد اخفوقـه
والليل قزرته هواجيـس واخفـوق

والنوم جفني مـا تطعـم ابذوقـه
مغيـر غطاتـن تقاطيـع وافـوق

لين النهار اصبح وبانت اشروقـه
والدمع من عيني على الخد مدفوق

بسباب من نفسه لنفسي صدوقـه
الجادل اللي كامل الزيـن والـذوق

اللي مشى وافـي وكمـل احقوقـه
ما يلحقه مني مشاريـه وحقـوق

اللي على شوفه اعيونـي شفوقـه
ما لاقلي غيره من البيض غرنـوق

اللي غرامي سارين فـي اعروقـه
وحبه بدمي خالـط الـدم بعـروق

سافر وانا نفسي عليـه امحروقـه
واهو بعد مثلي من الشوق محروق

وسافر معه عقلي وفكـري وذوقـه
آكل وكني لأطيب الـزاد مـا ذوق

اتل العهد والغيـم حـدره وفوقـه
اقفت به اللي تسبق الطير بلحـوق

وعودت نفسي من عناي امخنوقـه
من عبرتي ومفارق الشوق مخنوق

قلبي كتومن ميـر عينـي تعوقـه
عيني عن الكتمان يا ناس لي عوق

العاشق المجبـور عينـه نطوقـه
لو كان ما يبدي على الناس منطوق

غصبن على المشتاق بفراق شوقه
تكشف اعيونه ما بقلبه من الشوق

لولا ظروفي راهيـن فـي إلحوقـه
ماني على خوة هوى البال مسبوق

لاشـك قسمـة خالقـن بمخلوقـه
الحي لابـده مـن الحـي مفـروق

سافر عسى ربـي يسمـح وفوقـه
ويالله عساه بنية الخيـر مرفـوق