الأديب الشاعر عبدالعزيز السعود الصباح رحمة الله

[كويتى مخضرم]

قصيدة مليئه بالحكم و الامثال للشيخ الشاعر عبدالعزيز الصباح: (4)

يامن يخبرني عن الحق وينه
هو مات والا من طغى الناس هايم
أسأل وما ألقى أحد أستعينه
عنده جواب ايطمن البال دايم
والحق بس يذكر ولاشايفينه
حرفين نسمعها من الناس دايم
لو كان به حق تبين ابحينه
في عالم كله ذنوب وجرايم
اما الصحيح وكلنا عارفينه
الحق للقوة وذا له علايم
كم حق راح ومالقى من يعينه
والزور بالقوة يحوز الغنايم
وانا عرفت أهل الحسد والضغينه
اللي يحبون الفتن والشتايم
وش رايكم ياهل العقول الرصينه
هل تسمحو لي ذكرهم في قوايم
ليش استفزوا غيرهم تاهمينه
مافكروا بأوضاعهم والهزايم
واللي يصير بمالهم مشترينه
مايرفضون بسوقهم كل سايم
قالوا تصبر والصبر ذاكرينه
قلت الصبر دايم يهد العزايم
والمقتدر يفعل وتاصل يمينه
مابه صبر الا اذا كان شايم
دنيا تدور ولاتحب السكينه
تاطا على درب السهل والعدايم
لو دامت الدنيا على حال زينه
ما صار فيها من هموم وظلايم
احد يعاف الزاد نفسه حزينه
وحد من الفرحه يقيم الولايم
وحد بأطماعه يدنس يدينه
دايم بتفكيره على السطح عايم
يبلع ومايشبع وحاله زبينه
ملهوف مايرتاح قاعد وقايم
كم جاهل تاتيه فرصه ثمينه
ويفوز من حظه بما كان رايم
وكم عالم أمضى حلاوة سنينه
بحث ودراسة لكن الحظ نايم
قد يظفر الثعلب بصيده سمينه
يشبع ويرقد في ظلال الصرايم
أو ربما جاع الأسد في عرينه
بعد السمينه ماظفر بالهلايم
والجود اللي يشتهر فيه زينه
حيث الكرم هو والمراجل توايم
سبحان من أنعم علينا بدينه
حتى جعله فينا قوى الدعايم
بعض الأوادم له نوايا لعينه
وده على موتك تقام المآتم
يلقاك لي شفته بنفس وطينه
يفرح كما يفرح على الفطر صايم
ويضم في صدره أمور دفينه
يضحك وقلبه أسود اللون عاتم
وهو بظنه يخدعك في يقينه
ولادرى انه به الشك قايم
يامن يخبرني عن الحق وينه
هو مات والا من طغى الناس هايم