البارحه قزَّرت ليلي مسهـَّدْ
لا طاب لي نوم ٍ ولا لذة ارقادْ
كني على جمر الغضى آتجلد
ظليت بين النفس والعقل بجْهادْ
نفسي تقول ادحم وبالك تـَرَدَّد
وعقلي يقول احذرْك للنفس تنقاد
بالك اتطاوع شورها يالمقرَّد
واتصير مثل اللي يبي ايصيد وايصاد
كم واحد يحسب طريقه ممهد
دربه امان ٍ فارشينه بالاوراد
ويوم ان مشاه ايلاه وحش ٍمسدَّد
وشاف الخطر به كامن ٍ له بمرصاد
لا اتهمّ في أمر ٍ قبل ما اتتوكـَّد
خل الوكادة والركادة لك اسناد
ردت تقول النفس بالك تهيـَّد
كم حسبة ٍ فيها ترى العقل ما فاد
كم واحدٍ حَسـَّب وكسَّر وعدَّد
واتعب افكاره بين صادرْ وورَّاد
واتلاه تاه وحار بَامره وتلدَّد
ضاع الحساب وخانته ذيك اَلاعداد
دنياك في توفيج والحظ اَلاسود
من بار بَه ذَلـَّه ومن جاز له ساد
كم عاطل ٍ مثل الخمام المكوَّد
ضخم ٍ سنامه كنـَّه الثور ينقاد
وقته تبســَّــم له وحظه تقعَّد
دنياه جادت له وجت له بَالاسعاد
وكمْ عاقل ٍ رايه حصيف ٍ مسدد
في كلّ علمْ وفنّ ْ فهمانْ واستاد
بالحظّ ْ خلاه ابحياته مهدد
عيشهْ نكدْ والرزق ياتيه بَانكاد
خلها على الله واعتمد يامعوَّد
سَو ما تراه ويفعل اللــه ما راد
ـــــــــــــــــــــــــــــــــــــــ
الشاعر صالح النصر الله
|
العرض الشجري
