[معربه الجدين]

يا زمان العولمة والانفتاح =والمبادي عاجزين نصونها

وانجراف المسلمين اهل الصلاح= خلف منهي سبّلت بعيونها

مانرد الصوت (حي عَ الفلاح) = نلتفت للي تهز متونها

والغنادير الجميلات الملاح = كل وحدة تبدع بمخزونها

في رمضان ومن بدايات الصباح= تبدي الشاشة تبث عفونها

المسلسل من صراخٍ في صياح = والبرامج فارغٍ مضمونها

وان نشدت وقل : هل هذا مُباح؟ = قيل ((فن!)) وتسلية ياهونها

يا المعقد لاتحد من النجاح= والمشاكل لاتسن سنونها

احترام الدين اصبح مستباح = والفتن لا ما نعيش بدونها

والعبيد اللي عطاياهم شحاح=طاعة الله مالهم في شونها

عن الاكل صيّام بكبودٍ شفاح= حكمةٍ ما استوعبوا قانونها

مفلسين من الاجر والوقت راح = والمعاصي بالغلا يشرونها

والمحطات الفضائية رماح=تجرح الصوم بوسيع طعونها

والنميمة والقسا دون السماح = والهواوية تبي مفتونها !!

والطرب.. ويا الغنا شيٍ متاح = جعلهم بالاخرة يصلونها

يا الله تيسر طريق الانشراح=للعباد وينصلح مكنونها

ومن بغى يسلك طريق الارتياح=والذنوب تحاصره بفنونها

((الارادة)) هي فقط اقوى سلاح=تقلع جذور الفتن وغصونها