اين يقع اول مكتب للبريد؟
 

ممكن يفيدونا الاخوان عن موقع اول مكتب للبريد بالكويت؟
واقصد هنا ليس في سنة 1915 عندما تم افتتاح فرع البريد بدار الاعتماد البريطاني .

اي في سنة 1929 عندما تم تأجير بيت الشيخه لولوه بنت محمد الثاقب والدة الشيخ محمد و جراح ومبارك الصباح؟

حيث ذكرت بعض المصادر ان هذا البيت هو ملك الشيخه لولوه الثاقب.

ياريت تفيدونا بالمعلومه وشاكر لكم

موجود وباقي إلى اليوم بس ما راح أقول لك :)

بالأول صبّحك الله بالخير
اخوي sky_limit

اخوي المنتدى وظيفته تقديم المعلومات وتبادلها .. يعني الواحد منا لازم يعطي مثل ما ياخذ من الموقع.
وتبادل المعلومات يثري ويغذي البحوث التاريخية.

وما يخفى اسرتكم الكريمة لها تاريخها .. لاكن ما شفناك حطيت لنا شي عنها.. لو جم وثيقة قديمة تونّسنا فيها :)ونستفيد منها. (هذا بالعموم)

وحتى الحين في هالموضوع ما حطيت لنا مصدر ملكية الثاجب للبيت .. رواية أو وثيقة؟ ! (لأجل تكميل المعلومة وليس شكا فيها)
بالأخير يالحبيب .. لازم تعطينا عشان نتفاعل ويـاك :)

يمسيك الله بالنور اخوي جون الكويت :)

اول شي اعتب عليك لانك تعرف الاجابه على سؤالي ولا جاوبته, والشي الثاني هل من المفروض من كل عضو ان يضع معلومه عشان يحصل على معلومه بالمقابل؟ :)

راجع مشاركاتي و راح تعرف اني ذكرت معلومات كثيره والعاده اذا كان في احد يسال عن شيء يتفاعل معاه باقي الاخوه مشكورين باجابته, وانا حاضر على اجابة اي سؤال منك او من احد الاخوان بس انت اسال واحنا نجاوب :)

وردا على سؤالك على ملكية البيت فهذه روايات من عدة مصادر ويمكنك الرجوع لكتاب الكويت القديمه صور و ذكريات اعداد الدكتور يعقوب يوسف الحجي صفحه 188 واقتبس منه التالي:

"حرص الشيخ مبارك الصباح حين تسلم الحكم على انشاء بريد وبرق بالكويت. وتم ذلك في سنة 1915. ثم انتقل بعد ذلك الى بيت كانت تملكه والدة الشيخ محمد الصباح (الشيخه لولوه بنت محمد الثاقب) احد اخوة الشيخ مبارك الصباح, وكان ذلك في سنة 1929. واستمر العمل بهذا المكتب الى سنة 1941".

وصورة البيت موجوده بالكتاب بس للاسف ما اعرف شلون انزل الصوره من pdf files
ويمكنك الرجوع لقسم البحوث و المؤلفات و تنزيل الكتاب ( الكويت القديمه صور و ذكريات).

واذا عندك اي استفسار انا حاضر و ياريت عاد تقولنا وين موقع هالبيت :D

شوف هالكلام المكتوب اليوم .. يقرقع بصدري من زمان :) ودي أقولك اياه :)

وثاني شي لن أتنازل عن مطالبتي بوثايق من خزاين آل ثاجب العامرة ،، يعني احنا قاعدين نستفيد من الوثايق يا خوي فلا تبخل علينا بأي شي منها.
اما اسهاماتك فماني غافل عنها ..وأطمع بالمزيد:)

وأخيرا هذا البيت فيه شي من الاهمية التاريخية أكثر مما تظن .. آه بس لازم تدهن سيورنــا بجم وثيقة،، اي أشكرة :)

الكويت صور وذكريات

رفعه الأخ بدر اليتيم

حاضر وماطلبت شي افا عليك :)

بس تدري اخوك عليمي شوي بتنزيل الملفات وقلتلك انا صوره موجوده بالكتاب و اهو موجود بالرابط ماني عارف انزلها بس عطني فرصه اعرف شلون طريقة التنزيل وان شاء الله راح تشوف مايثلج صدرك بالوثائق والمراسلات القديمه ;)

مشكور يا خوي وماقصرت بس انا كان سؤالي عن موقع هذا البيت بالتحديد . وياريت احد الاخوان يفيدنا عن طريقة تنزيل الصوره بالموضوع.

اقتباس:

وان شاء الله راح تشوف مايثلج صدرك بالوثائق والمراسلات القديمه ;)

ما تقصر يا الغالي .. وعندنا من الخبرات بتنزيل الصور بدل الواحد عشرة .. وتقدر تراسل أي واحد من المشرفين على الايميل وينزلها لك بقسم البروات والوثايق.

وابشر بسعدك:)