|
الدوارف فى الميدان
5 مرفق
كثير من الافلام الوثائقيه القديمه عن الكويت اشوف فيها الدوارف (مفردها ديرفه) وكنت حاب ان اكتب عن هذا الموضوع باعتقادى ان محد تطرق له اسمع البعض يسمونها ديارف واحنا اهل شرق انسميها دوارف ولا اعلم من وين ياى الاسم قبل العيد بيوم يجون العمال (كلهم كويتيين بذاك الوقت جريمبه ورابط دشداشته بوسطه) ويركبونهم فى ساحة الميدان والدوارف عباره عن 2 قلّيلبه (سحاحير خشب) و 2 ديرفه هم من خشب وتكرمون حمير للتمشى هذى مدينة الملاهى مالتنا بالعيد الركبه بانتين او باربع انات الايس كريم عباره عن شربت مثلج محطوط فى مطارة ام نسر لكن عيد بحق وحقيق واناسه ما بعدها اناسه نرجع البيت ونقط راسنا على المخده ونشاخر راسا انّام امبجر علشان باجر اين تقع ساحة الميدان؟ http://www.kuwait-history.net/vb/up/...6920131111.jpg عملت هذا التخطيط يدويا علشان اشرح المنطقه اللى تتكون من عدة فرجان ساحة الميدان فى الخريطه تمثل رقم 7 وهنى مفتاح الخريطه 1 البحر 2 مسجد بن خميس 3 عماير بن عيسى وبن حييى 4 نقعة بن خميس 5 شارع الميدان 6 مدرسة الميدان (بعدين صارت مستوصف او عياده للاسنان) 7 ساحة الميدان 8 بيت الهولى وولدهم عبدالرزاق رحمة الله عليه حى او ميت 9 بيت حسين كمال رحمة الله عليه (اولاده على واحمد) 10 بيت المناعى (يوسف ومبارك) رحمة الله عليهم 11 بيت الفيّاض (يوسف وفياض) رحمة الله عليهم 12 بيت التركيت ولدهم اسامه (وزارة الداخليه) وحازم 13 دكان عبدالرزاق العيسى (اولاده جاسم وخالد) 14 فريج بن قطامى 15 بيوت بن قطامى 16 بيت الصقر (عندهم ولد وبنت وغايبه عنى الاسماء) 17 فريج بن خميس 18 بيت على الرشود ويسمونهم بيت اليمانى 19 بيت بوقماز (اللى فى كيفان الحين) 20 سكة منحدره تؤدى الى وزارة الصحه 21 موقع وزارة الصحه 22 + 24 بيوت بن خميس 23 بيت اسحاق (يوجد قرابه مع ملا حسين التركيت) 25 بيت فهد السلطان رحمة الله عليه (مركز سلطان) 26 مطعم صادق يبيع صمون 27 بيت محمد الفياض (رحمة الله عليه) وتدخل له عن طريق سكه 28 دوار الميدان 29 حلاق هندى كان يطقنى على عتراى لما يخلص من الحلاقه لى الحين حاقد عليه ههههههه واعتقد انه يطهّر لانه الوحيد اللى عنده موس 30 موقع وزارة التخطيط حاليا 31 شارع الخليج 32 مدخل شارع الميدان من البحر 33 هنى عضنى جلب اعيال فهد السلطان (اولا فهد السلطان اثنين نسيت اساميهم) انتقلوا للقادسيه عقب شرق الخريطه ما كملت ولكن من بعد رقم 20 او فوق رقم 20 بيت العصيمى (ولدهم فهد وفارس واعتقد انتقلوا الى النزهه بعد شرق) وكذلك بيت الابراهيم اللى ولدهم اسعد (طيّار) اما فوق رقم 16 فيوجد بيت ملا حسين اللى اعيالهم فؤاد ونزار وعبدالله بين رقم 20 و 16 هذى السكه اكو وحده تبيع باجله ونخى بس ما اعرف منهى وهذى السكه اللى نمشى فيها ونروح الى مدرسة الشرقيه وبالرجعه نمشى على البحر وندخل العماير ونمر على بيت دكسن ونتقلقص بين السور الحديد وندخل حديقتهم ونبوق طماطهم لين حطوا شبك مال الدياى وما قدرنا ندخل بعدها http://www.kuwait-history.net/vb/att...1&d=1383169092 هذى الصوره تمثل فريج بن خميس الدخله رقم 17 على يمينك بيت الفيّاض وعقبه بيت الصقر وعلى يسارك بيت اليمانى وعقبه بيت بوقمّاز هذى المرحله مابين سنة 1952 الى 1958 وبألتأكيد انا نسيت الكثير او اخطأت الكثير سواء فى البيوت ومواقعهم الدقيقه او بالاسماء لانى معتمد على ذاكرتى اللى بدت تضعف فأرجو من يملك الصح والصحيح ان يذكره مشكورا كما ارجو ان وفقت لنقل الصوره اليكم الموضوع الياى سوف اذكر بعض الذكريات فى ذاك الوقت |
قواك الله ياخوي
اذا كنت تعرف ترسم لنا اي فريج ثاني ارسمها واعرضها لنا |
الصور ممتازة
|
اقتباس:
فريج فى جبله بس ما ادرى شينقاله اعرفه عدل واقدر اتصوره فى ذاكرتى لكن ما اقدر ارسمه على اورقه مثل فريجنا شرق فريج بن خميس ولكن اتذكر البيوت اللى هناك مثال بيت البحر ولدهم عصام وبيت عبدالعزيز بشاره ولدهم سعود وخالد وبيت الفارس وعندهم ديوان عود وولدهم خالد ومن ديوانهم تمشى سيده الى ان توصل الى مستوصف جبله ويجيك شارع وهذا الشارع اللى فيه مبنى الكويتيه قديما (ما ادرى لى الحين موجودين فيه والا ارحلو) هذا الشارع اللى يتقاطع مع شارع الجهره وبيت عبدالرحمن الحساوى وعندهم اولاد وايد منهم ابراهيم ومحمد وبيت بوحمد واعيالهم وايد اذكر حمد وارحومى (عبدالرحمن) بحاول ارسمه واذا يازت لى الصوره رفقتها لك واذا تعرف الاسماء اللى ذكرتها قول لى علشان تساعدنى برسم الفريج |
اقتباس:
|
2 مرفق
من الذكريات اللى ودى اتطرق لها لما نركب الديرفه يدزها ريال لمده قصيره بعدين يقول هذى زياده (جذاب) عبد الساده (جذاب) طلق مرته (جذاب) وعاف عياله (جذاب) واحنا نرد عليه بعد كل بيت بكلمة (جذاب) ويرددها جم مره اعلانا بقرب انتهاء فتره ركوب الديرفه وبعدها يوقف الدز ويقول لنا يلا حدروا واعتقد هذا يتكرر مع القليلبه نفس المنوال ---- مرات وايد يجون مالوت البلديه ويرشون الساحه (ساحة الميدان) بمواد قاتله للحشرات بمواد كنا نسميها دى دى تى http://www.kuwait-history.net/vb/att...1&d=1383361133 الملفت للنظر ان المواد ضاره للانسان ولكن احنا ماكان يهمنا كنا نلعب بوسط الدخان الكثيف دخان الدى دى تى ---- دفاية تشتغل على الكاز (الكيروسين) كانت مشهوره جدا بذاك الوقت وتقريبا موجوده بكل بيت اتذكرها ولا زلت اتمنى ان اقتنى مثلها الان http://www.kuwait-history.net/vb/att...1&d=1383361426 نستخدمها بالشتا ومرات اننشف عليها الملابس الرطبه او نشوى عليها الكستن او نسخن عليها الخبز وناكله ريحته كاز ولا صار فينا شئ (ولله الحمد) فيها فتحتين اللى فوق لها مثل المفتاح يمين ويسار ونحدد كميه الحراره اللى تطلع والفتحه اللى بالنص علشان نشب الكاز ومخزن الكاز فى القاعده ---- الساعه 4 العصر وشبه يومى تمر سيارات البلديه لونها اخضر وهى عباره عن تناكر فى دعاميتها الجداميه فتحات يخرج منها الماى كالمرش كل يوم تمر وترش الشوارع وخصوصا شارع الميدان ما ادرى هل هو تنظيف للشارع ام تلطيف للجو ولكن المنظر يتكرر يوميا ---- المره اليايه راح اتكلم عن الحبال والقبابى |
مجموعة صبيان لمن يروحون فريج ثاني واول ما يشوفون صبيان الفريج اللي رايحيلهم يبون يطفرونهم شلون . يقموون يطقون بريلهم الارض ويقولون ( دجو فريجهم دجو ) . في صبيان يردون عليهم و يتهاوش وفي منهم لا ما يسوون شي يقعدون بمكانهم وما يتهاوشون |
اقتباس:
تبدى بجملة اشحقه ياي فريجنا؟ سنة 1946 صارت هوشه كبيره بين صبيان من فريج الزهاميل وصبيان من فريج ثانى بسبة القرقيعان وصار فيها طق امطاقق عصى وسجاجين ويقولون الحكومه فاككتهم وامنعوا الصبيان الكبار من القرقيعان عقب ذيج السنه صار حدهم كاسروه دله بس |
اقتباس:
شلون صارت بسبت القرقيعان اقصد شنو سبب الهوشه اللي صارت عشان سببها القرقيعان |
جزاك الله خير ما قصرت الحقيقة استمتعت بالمخطط دقيق ووافي لكن اذا سمحت وتكرمت عندي ملاحظة بسيطة وهي صورة الفريج اعتقد وبحسب روايات الشيبان وما هو متعارف عن هذه الصورة انها صورة لفريج سعود في الحي القبلي وليس فريج الخميس والله أعلم...سلمك الله سلامة الأبرار وحفظك من طوارق الليل والنهار
|
| الساعة الآن 10:06 PM. |
Powered by vBulletin® Version 3.8.7, Copyright ©2000 - 2024
جميع الحقوق محفوظة لموقع تاريخ الكويت