لنصرخ بأعلى صوتنا
 

السلام عليكم
يسمحون لي أخواني المشرفين أتكلم شويه خارج عن التاريخ وعن النسب والعوائل ,
أتكلم شوي عن حال ديرتنا,لان في كلام غاصه فيه ودي أقوله علشان أرتاح , وياريت الاخوه والخوات يوسعون صدورهم .
ما أدري انتو تدرون ولا لأ أن سوس الفتنه قاعد ينخر في كيانا ويضععف تلاحمنا ,ليش ولمصلحة منو هذه الفتن.
اولا:الجويهل حطله محطه أخذ يتكلم عن العوائل وعن عيال بطنها ,الكل قام عليه وصرخوا بأعلى صوتهم هذه تفرقه وهذا ما يصير وتدخلوا القبائل ودخلوا الجويهل النيابه.
ثانيا:أخونا الرفاعي كل سنه يصدر مطويته بمناسبه عاشوراء ويذكرنا بالصيام بهذه الايام ,شمعنه هذي السنه قاموا أخوانا الشيعه يحاربونه ويبون يزيلون مبرته,وشنو اللي صار عن كل سنه ليش كل هذا الاصراخ .
ثالثا:كلنا نعرف في ناس عندهم جنسيه كويتيه وجنسيه ثانيه من اي بلد كان,والله أعلم بالقلوب يكون الولاء لأي بلد,وليش لما صرحت الحكومه بسحب الجنسيه الكويتيه من المزدوجي (ومن حقها) الكل قام يصرخ والكل يلقي التهم على الاخر ,سواء البدو ولا العيم ولا الحضر ,ودي أعرف ليش كل هذا الصراخ هل ينطبق عليهم المثل "اللي على رأسه بطحه يتحسس عليها ".
رابعا:حتى الرياضه اللي طول عمرنا ما نعرف الا نادي العربي ونادي القادسيه والشهيد فهد الاحمد رئيس الاتحاد الاسيوي,اما الحين عرفنا اشياء وايد بالرياضه الاتحادات والهيئه العامه للشباب والرياضه وطلال الفهد ومرزوق الغانم ومجالس ادارة الانديه وكل منهم يصرخ على الثاني وللحين ما صلحوا شي ولا غدا شرنا وما يجيدون الا الاصراخ,
وكل هذا لمصلحت منو ماأدري,لا تقنعوني ان كل هذا لمصلحة البلد.
يا جماعة الخير احنا اخوان كلنا عيال هذه الديره ,يمكن ما يجمعنا الاسم ولا اللقب ولكنا يجمعنا حب هذه الارض الطيبه واسم واحد وكلنا نتسما فيه أهو" كويتيين."
ياخواني اباؤنا كانوا كلهم يد وحده ما فرقوا بين البدوي والعيمي والحضري,ولا بين السني ولا الشيعي ,كلهم أركبوا مركب واحد وشقوا البحر رايحين ويايين يدورون على رزقهم ومحد منهم يصرخ على الاخر,والسني يشارك اخوه الشيعي شعائر مذهبه بدون صراخ ,وكان السني يروح الحسينيه وهو صايم ومحد كان يصرخ ويقول ليش انت صايم.
الاحين كل من يصرخ من صوب ليش لمصلحة منو وشنو يبون ,هل اللي يبونه يصير للبدو محافظه وللعيم محافظه وللحضر محافظه والكل يمسك سلاح يدافع عن محافظته.
ياريت احد يرد علي ,ولا سكتوا هذا الصراخ بكلمه واحده نطلعها من قلبنا وبصوت واحد

بـــــــــــــس
اسكتوا خلونا نعمر ديرتنا ونردها مره ثانيه درة الخليج

واشكركم لسعت صدوركم.

الاخت الكريمه شكرا لك
 

الحمدالله الديرة بخير ونعمة والله يكفينا شر الحاسدين وانا متفائل لانه بالاخير مايصح الا الصحيح

بارك الله في الاخت الكريمه ( القدساويه ) وفينا جميعا بأذن الله .
سبب ما يحدث في الكويت هو السعي وراء المال والسلطه وطلب رضى رب العمل وعدم العمل بأمانه وعدم خشية الله جل جلاله .
الموت قادم لا محاله والآخره ويوم الحساب كذلك فالنعمل لآخرتنا وندعوا لنا ولهم بالهدايه والمغفره .
ولكن لا يعني ذلك ان نقف مكتوفي الايدى ونتفرج ( علينا ان نبدأ بأصلاح انفسنا وبيئتنا ) .
لنتكل على الله سبحانه وتعالى ونبدأ من هذه اللحظه .
( لا أله الا الله وحده لاشريك له )

السلام عليكم


بارك الله في ابنتك ويخليها لك ويحلو كلامها
الخوف لما يكبرون هاليهال تتلقفهم الاحزاب والتيارات اللي قاعده تصرخ وتخليهم يصرخون وياها

اللهم آمين

ياريتني أتفائل مثلك أخوي بوخالد

هذا اللي أخاف منه اخوي بوعبد المحسن حب المال وحب المصلحه الخاصه عن المصلحه العامه وعدم الخوف من عقاب الله سبحانه وتعالى,يخربون الديره



صح لسانك اخي عبدالرحمن بك



اللهم آمين ,وجزاك الله خيرا أختي ام عبد العزيز وكلامك الطيب اللي يبرد على القلب

بارك االله فيكم اخواني وخواتي ونبي نقول كلمة بس نقولها كل من يقف ضد مصلحة تقدم هذه البلد الطيبه

الـكل غنى على ليلاه والـكل لـف ودار
وإذا بالحق واجهته عطاك ظهره ودار
ليما المواطـن ضـاع إفـتر راسـه ودار

ســويتونا حـضر وبـدو وشيعه وسنه
نبي نعرف المال حفظه فرض أو سنه
يقـول لنا هذا رأيـه ومسـتعد إيلاسـنه

رجعوها لنا وغنوا يادارنا يادار

[ame]http://www.youtube.com/watch?v=y7n6Tr5kIr4[/ame]


شـخابيط

عسى الله يحفظ هالديره اللي اتعبوا اجدادنا يبونها و لما صارت شي من لا شي .

و الله القلب يتحسرر على حال الكويت اليوم .

كل ما اشوف اليوم التفرقه و التحيز لطائفه اتذكر حجي يدي رحمة الله عليه .

يقول عاشرت واحد من اهل فيلجا فوق 25 سنه وناكل من قنجه وحده ( صينيه ) و نقعد بمكان واحد و ما دريت انه شيعي اله يوم توفى .

كانوا مؤمنين انه على الله الحساب مو بيد الناس , مفردة هذا بدوي متى طلعت ؟

ما صارلها 10 سنوات منو المسؤول عن اللي قاعد يصير بهالديره .

و انا قاصد اني ما اتكلم بأسلوب و مفردات نحويه و علشان الواحد يعرف يعبر عن ما يجول بخاطره اتجاه ديرة الخير و شعبها الطيب .

يا حلونا قبل عايشين بفريج واحد وكنا على قلب واحد عمرنا ما قلنا هذا شيعى ولاسنى ولابدوى ولا حضرى كنا

نقول هذا كويتى وبس

الحين الوضع تغير وطلعت لنا مصطلحات يديده داخل السور وبره السور ومزدوجين وحضرى وبدوى وكل واحد

يناجر ويناحر الثانى وخلوا الناس تكره بعض حتى اليهال الصغار بالمدارس يسالون بعض انت سنى ولاشيعى ولا

انت بدوى ولا حضرى وتكتلات بالمدارس ويفزعون حق بعض وهالمظاهر ما كانت موجوده قبل بمدارسنا

ابى اقول كلمه اخيره والله الكويت ما تستاهل والله يحفظ لنا هالديره من كل شر ويحفظ اهلها وناسها الطيبين

الى الاخت الكريمه , العنصريه كانت ولا زالت متواجده منذ القدم وانا اعلم عما اتحدث كوني اعيش في منطقه يعيش فيها مختلف التيارات والطوائف والاحزاب والقبائل .
ومنذ الحرب العراقيه الايرانيه بدأت النزاعات الطائفيه او بالاحرى اود ان اسميها (المذهبيه ) والآن زاد عليها النزاع القبلي والعائلي والغني والفقير .
العنصريه اصبحت اكثر تطورا الآن لانه لا يوجد من يوقفها لا يوجد احد من الحكمة ان يوقف العنصريه هل ينتظرون حروب اهليه بين الشعب بأمكان اي شخص الحصول على السلاح فكما تدخل المخدرات تدخل الاسلحه .
حسبي الله ونعم الوكيل على من يريد تدمير أرض عشنا بها مئات السنين .

السلام عليكم اختي القدساويه الصراحه الكلام في هل موضوع اعور القلب بس الواحد مايقول الا الله يحفظ ديرتنا من هل فتنه ويحفظ اهلها الطيبين

الله يحفظ الكويت اللهم امين

السلام عليكم
والله ما أقدرعلى كلامك, غير صح لسانك اخوي mub2
وياريت كلنا نغني كلنا يا دارنا يا دار ::::

الله يرحم جدك وصدق كنا نعيش أهل وأكثر من أهل ماكنا نعرف شنو شيعي وشنو بدوي وشنو حتى بدون كنا كلنا أهل الله يجازي من كان السبب

صدقتي أختي كندريه ونردد دعائج
(والله يحفظ لنا هالديره من كل شر ويحفظ اهلها وناسها الطيبين )


اسفه اخوي بوعبدالمحسن هالمره أخالفك الراي من القدم ما كان في تفرقه ولا الجدال اللي صاير مثل هذه الايام كنا أخوه ويد وحده سواء في الفريج ولا في المدارس ولا في العمل
فعلا مثل ما قلت ماظهرت هذه التفرقه الا مع الحرب الايرانيه العراقيه

فعلا يعور القلب أختي خوخه ,والله يحفظ ديرتنا من شر الفتن
اللهم امين اختي لولوه

وشكرا أخواني وخواتي على تفاعلكم مع هذا الموضوع ادري يعور القلب,والحقيقه تجرح ,بس نبي نوقف هذه الفتن عشان الوطن يعيش بسلام,واحنا نعيش بأمان