[محمد بن ناصر]

أتفق مع اخواني المعلقين في مايتعلق بأمن اللهجة الكويتية. اللي نشوفه حالياً يحز بالنفس من البدليات وأخطاء بالنطق وحجي على سنع ماكو. الحمدلله إن الكويت فيها ناس غيورين على لهجتها من أدباء وكتّاب أمثال حمدالسعيدان، وعبدالله النوري وأيوب الأيوب وغنيمة الفهد ود. ليلى السبعان وخالد الرشيد وفؤاد المقهوي وغيرهم من الطيبين رحم الله من ودعنا وحفظ من معنا. الكتّاب سالفي الذكر لهم كتب وزوايا في الجرائد حافظة للهجة الكويتية ومعروفة عند الكل، ولكن المشكلة إن شباب هالوقت إلا مارحم ربي مالهم بالكتب وكانت هذه مشكلة بسبب ثورة الإنترنت اللي خلت الناس تهجر الكتب والمكتبات، ولكن لو خليت خربت، ففي مجموعة من الشباب الغيورين على لهجة الكويت مسوين موقع (BLOG) متخصص باللهجة الكويتية اللي أهو:
www.7achy.com

دشيت الموقع وشفت شي يفرح والله ويشكرون أصحاب هالموقع، فعلاً استغلوا شعبية الإنترنت وسووا موقع يعلم اللهجة الكويتية ومصادرهم تقريباً جميع الكتب المتخصصة باللهجة الكويتية. طبعاً كل يوم أو كل يوم وترك يضيفون كلمة يديدة مع شرح بالعربي والإنجليزي لمعناتها وأصلها في اللغة ومثال سياقي لها ومقطع صوتي حق طريقة نطقها. ماشاء الله عمل رائع يشكرون عليه وهذا شي يدل إن الدنيا للحين فيها خير.