|
حجينا رطينه
حجينا مايفهمونه حجينا حقهم رطينه
يوم قلنا احنا رحنا قالوا فلينا مشينا وبصراحه ماكو راحه قالوا بلشنا بدينا حتى بالاعياد والله خربطو والله علينا حجبهم كله لجاجه للولي احنا شكينا بس تدرون الصراحه كل ذا من صنع ايدينا شكثر حجي خلطنا ومن رطينه والمصيبه هم رضينا لهجة الاجداد ولت ضاعت اللهجه علينا حجينا جنه رطينه صرنا مانبلع حجيهم وحجينا مو فاهمينه السوالف دردشه صارت مقاعدنا حزينه صج والله ابتلشنا وكل ما قلنا بدينا قالوا احنا ( بلشنا ) يعني معناته بتدينا والله حاله الرهش مايعرفونه والتمر لا مايبونه والهريسه و اليريشه بدلوه بسندويشه شربت البيذان والساقو بالباربيكان واللباس اللي بعضهم ينكرونه وحتي هم مايلبسونه ويجهلونه .. بدلوه بالبنطلون والشعر فوق العيون ماتعرفه شنهو هذا كلهم يتشابهون واللعب كله صار كمبيوتر وقيمز راحت ايام المصاده واللي صاده والله ماتعرف مراده ياربع حتى الرفاقه مايرافق الا حاجه مير رافجته القراده والحجي كله لجاجه دوم لجه دوم صيحه وفي النهايه حجينا مايفهمونه وفننا ما يفقهونه وضاع حابلهم بنابل ومايعرفون الكنابل وضعنا في طوشه ولوشه والمهم الله يهديهم ويهدينا واحمد الله واشكره واصلى على الهادي نبينا |
صح لسانك يا ام عبدالله.. بالصميم.
|
والحجي كله لجاجه .. دوم لجه دوم صيحه
وفي النهايه حجينا مايفهمونه .. وفننا مايفقهونه .. وضاع حابلهم بنابل اي والله صح لسانج اختي العزيزة .. أم عبدالله العوضي |
حجينا جنه رطينه
صرنا مانبلع حجيهم وحجينا مو فاهمينه يبتيها على الجرح ام عبدالله اغلب كلامى لما اتكلم بالداوم يقولون لى كلامج وايد قديم اقولهم هذى لهجتنا الى انتو نسيتوها يعطيج العافيه وتسلمين على النقل |
حبايبي معلومه واصيله مشكورين ياعمري
والله حتى مع عيالنا حجينا مايفهمونه يقولونل يمه شتقولين قلت يايمه هذا الحجي العدل اللي قلبتوه وغيرتوه بحجي ماله راس ولا كرياس يقولون لي يطلع من حلجك غبار لما تحجين واعيز اعدل لهم والله المستعان المصيبه العربي صار خربوطه مربوطه من شويه اللغه العربيه تنعي نفسها بين اهلها الله المستعان ماعليه احنا نحاول نعدل لهم كل ما حادو عن الطريج ومشكورين واحب اعرف رايكم في الزهيريات اللي كتبتها اكو منها من تاليفي فارجو ان اعرف رايكم بعد جبدي ................. |
رطينه ..
على قول الشاعر يحتدي مثل الجمل تسمع رطينة مع الطمان القاع مثل الثعلباني |
كلمات جميلة تحاكي واقع نعيشه، أحسنت أختي أم عبدالله
|
مشكورين اخواني درانك وشرقاوي
عساها على خير عسى ماينسون العربي بس |
الغالية أم عبدالله العوضي بداية أحب أرحب بالشاعرة والأديبة والكاتبة ، هناك لربما القليل من يعرفك لربما المحيطين بك فقط ، وأنا من القراء لك ولما أنت تكتبينه ولكن لا تسأليني من أن آتي بكتاباتكِ ، (( هناك من يسرقها منك ليقي بها في مسمعي لكونه يعلم أني من المحبين لما أنتِ تنشدينه )) . الفاضلة أم عبدالله العوضي لا أعلم لمَّ أنت لا تنشرين ما تكتبينه من أدب ومن كتابات القليل من في يومنا هذا هو من يكتب ما أنتِ قادرةٌ عليه . هذه الزهيرية جميلة جداً جداً جدا وكثيراً ما تشدني وتستوقفني ، ولك الكثير ممن أنا قرأت لك أقف لك إجلالاً وتكبيراً دافعاً بكِ إلى الإستمرار والعدم التوقف وطباعة ما تكتبينه ، لأن هناك من هم في عوزٌ شديد لهذا النوع من الأبوديات والزهيريات التي أنتي ملمه بها . أهيدك بعض من الأبوديات وزهير متمنياً أن تنال من إعجابك:- عِـــجْ بالــــــروحْ لا تعاوِدْ تِرجَـــعْ تعاودلي بعدْ لا تعاودْ أبدْ أنا صفحــــــة ما بين إيديكْ أو بعد إقطف وردِتَكْ مــــــن هايّ القلبْ يرويد أو بعدْ خِذْ كلّ ما بدا شوقـــي محَبِتَكْ عطفي والوعد بُكرى يِجِف المايّ تموتْ الروح يِتغنى فيكْ البُعِدْ على يامود امدولبْ إب هالروح وترمي إبها إهــنا وإهــنا وإهــنا ولــك ياهــو يعيـدْ تَرْميمها البيــوتْ هِدْمَــتْ وأنــتْ يالـّ بِعِتْ دنياكْ هيمها هايّ كل اللي على مُواويله ما شَيِدتْ بيوتْ الوَكِتْ مِنْ يومْ جالـــــِبْ أبدنً ولاهاد والفرقا منْ عُقُبْ عينِك نِحْباها ماهاد و ِسْجانْ قلبي لو كِتَــــــــمّ بيّ ماهاد زماني رماني ولا عاد بيّ أنسى بَعْلِكْ جِلبْ بالكادْ وايدْ ماهانْ لا حَنّ بالقَلُبْ ولا عليك بالقلب هانْ حيرة بيا سجية أمتدح ولا هان وسفة عليهُمْ يومْ بكْ يبيعون وحـــقِ اللي تَعبـــــده الناس ولهان أنتْ عليّ أبد(ن) قلبـــــــكْ ولا هان ولا من وكت شخصي بشخصك هان حـــرامْ بالنايبات إتهِلْ عليه كما أهديك هذه القصيدة وهيَّ من القصائد التي أنا كتبتها في موقف لإمرأةٌ صدوقة وجريئة أكنُ لها كلَّ إحترام وود . اسمع يا بن عربيد مني جاك الجواب أنا متزوجه ومحنا للبعض خِلّ عاشقه ولي حبيب(ن) ما بين الأهداب هو ساكن(ن) فيني وأنا سُكناه يوم(ن) يِطِلّ لي معاه عشرين وسِب حبي أسباب الجِسدْ حال(ن) له لو قال الشرع ما يْحِلّ هو يطلب ويدللّ كان هو طالب أنا طوع أمره متى ما عليّ بالزول هَلّ هو عزوتي ورجوايّ حاضر(ن) غايب هو حلي يوم(ن) المذاهبْ عليّ ما تِحلّ مفتونه به وحبه فيّ دابب هو حين يطلبني أجيه أنا من غير هِلّ له أرخص الروح دام هو حابب أرقص بصُلخِ المفاتِن وأنثر عليه الكل معاه استلذ وأعوف أنا كل المذاهب هو خليل(ن) لي وهو الكِلْ بالكل مفتاح قلبي بيدة وقلبي فيه ذايب لا أقدر أحب غيره ولا ودي بغيره خلَ أحبه وأعترف وحِبه بيّ غالب أول اسمه (ع) وآخر حروفه ل ولمّ أجد يا أم عبدالله ما أستطيع أن أكتبه أمام هذا الإعتراف الجزل والجريئ ويؤسفني أنه من كان يمدني بما أنت تكتبينه هو على وشك السفر ، ولربما يطول سفره سنوات وسوف نحرم ممن أنت به من علم لهذا الجزل وهذا العلم الجميل من الشعر ومن الزهير ومن الأبوديات الجميلة والمؤثره والمثمره لكثير من الشعراء .. فشكرا لك لما كتبتي وشكرا لك لما قرأت لك |
الفاضل العربيد
حياك الله وبياك وارحب فيك من قلبي اخجلت تواضعي ياخوي والله وارجو ان نظل علة تواصل في هذا المنتدى الراقي واتمنى ان تقيم ما اكتبه وانت في الحقيقه ممن لا استطيع ان اوفيهم حقكهم وبصراحه فعلا اخجلت تواضعي ويالله على ايدك الديوان يمكن ينولد ويشوف النور وربما هذا الحمل الذي استمر طويلا يمكن ان له ان يتمخض بولاده سهله دون فتح بطن وييسر ربي سبحانه وسوف ارد على كتابتك اللي اعجبتني كثيرا فعلا في الوقت المناسب لانشغالي حاليا وعلى الوعد |
| الساعة الآن 05:12 AM. |
Powered by vBulletin® Version 3.8.7, Copyright ©2000 - 2024
جميع الحقوق محفوظة لموقع تاريخ الكويت