استفسار: عن عائلة المقاطع

[ام يعقوب]

السلام عليكم ,,يا اخوان انا عندي سؤال وانا والله ما سبيت احد ولا اقصد شي من وراء

السؤال .. وسؤالي هو عن عائلة المقاطع ..اذا في احد يعرف عنهم شي عن اصولهم

ونسايبهم ..لأن في احد منهم خاطب واحدة وودنا نعرف عنهم اكثر ..اذا في كلامي شي

علموني ,,وكلي شكر للادارة وكل من قرأ ورد على سؤالي ,,وارجو عدم الحذف لأني كتبت

من قبل على نفس العائلة وما في احد رد علي

[جبل واره]

و عليكم السلام و رحمة الله و بركاته ،

أول شي: و ثلاثين ألف نعم بعايلة المقاطع، ناس اجاويد من اهل الكويت و معروفين و من اللي يتشرف الواحد فيهم من كبيرهم لي صغيرهم.

و الكلام اللي بكتبه فيما يلي ماله شغل بخصوصية سوألج، انما نقطه عامه بتكلم عنها للأهميه.

فاسمحي لي اختي ادلي بدولي بجزئية معينه لج و لبعض الاعضاء، ولا يهونون الاخوان كلهم.

و الدين النصيحه مثل ما يقول الحديث الشريف.

اولاً: هالمنتدى منتدى تاريخ مختص بالكويت، و فيه قسم مختص بالاسهامات التاريخيه و عوائل الكويت الكريمه. و استغرب اثارة اسئله على غرار:

ما اصول العائله الفلانيه، و شنو ترجع له العائله العلانيه ؟ و هل صحيح ان كذا هم كذا؟

و ينتظر اي عضو يجاوب عليه .... و ما يدري حقيقة او هوية الشخص اللي جاوب، او مدى مصداقيته.

و فوق هذا الموضوع يتعلق بمسألة زواج ... هل تعتقدين ان الانترنت هي المكان المناسب للسوأل؟

محد يبخس حق المشرفين هني يزاهم الله خير، متابعين اول بأول باللي يقدرون عليه، و ما يسمحون ان احد يمس ناس ولو بشعره.

لكن هم الاعضاء عليهم مسؤوليه، مو اي سوأل او اي شي اكتبه.

اختي ام يعقوب ،،

عشان اوضح اللي اقصده من الديباجه اللي كتبتها فوق:

افترضي ان شخص ما يخاف الله و عنده حزازيات او حسابات بيصفيها مع اي عايله من العوايل الكريمه اللي ينسأل عنهم بهالمنتدى .... قال لج: والله فيهم و فيهم! ... و قام و افترى على الناس الكرماء من ورى الشاشه و بإسم مستعار. شلون بتعرفين انه متحامل او صاج؟

هل بتتوقعين انه بيتحمل مسؤوليه كلامه؟

اختي ... و اوجه النصيحه لكل من يحط اسأله من هالنوعيه.

المعلومات على الانترنت اذا ما كانت موثقه و تعرف مصادرها، او لها اسانيد واقعيه، فلا تعتمد عليها.

اما مسألة زواج، ولا عندي استفسار عن جذور ناس كرماء، فأبتعد عن الفضاء السايبري بهالحاله، و اروح اسأل الناس الموجوده حولي و الحقانيه و الباخصه.

ما اعتمد على معلومه قطها شخص من ورى الشاشه و انا ما اعرف مدى صحتها.

و ياليت ما نتبعد بالمنتدى عن النهج التاريخي و مناقشة التاريخ السياسي و الثقافي و الاجتماعي للكويت بصوره عامه.

و نحافظ على جو و اختصاص المنتدى و حرفيته، عشان ما يئول حاله الى حال بعض منتديات الانساب اللي اذت الناس ببيوتهم و شرعوها اصحابها لمن هب و دب لينالوا من بعض العائلات و الاسر بكل استهتار ولا مسؤوليه.

فالله يخليكم حافظوا على جو منتدانا و اختصاصه بالتاريخ.

و الله الموفق ،،،

[المراقب]

صح لسانك ياجبل واره...كلام منطقي وجميل

[جبل واره]

صح ابدنك اخوي المراقب

تسلم و يزاك الله خير

[بن مسباح]

أحسنت يا جبل واره,,
هذا والله الكلام الموفّق والمتّزن والهادف والعاقل,,
جزاك الله خير وبارك الله فيك,,

[ام يعقوب]

اخي جبل وارة واخي المراقب كل كلامكم صح وانا معاكم في كل اللي قلتوه لكن عائلتنا

متناسبين مع عائلة المقاطع وهم خوش ناس لكن اللي يحز في النفس اني ما لقيت لهم اي

شي في المنتدى وهو يتكلم عن الكويت والعوائل الكويتية وهم ما لهم في الحظ نصيب وبغيت ان

يكون لهم حظ في المنتدى يذكرهم وهذا كل اللي ابيه وبس ودمتم للمنتدى والكويت

[جبل واره]

اخت ام يعقوب.

والله و ثلاثين نعم، تكفي السمعه الطيبه اللي تتمتع فيها هالعايله الكريمه بين اهل الكويت.

اما الذكر في المنتدى هني، فهو مجرد اجتهادات. و عدم ذكر احد معين او مجموعه معينه، لا يعني اغفال دورها و اهمتيها و سمعتها الطيبه في المجتمع الكويتي.

و يزاج الله خير

[جبل واره]

ما عليك زود يا اخوي الكريم بن مسباح ... بارك الله فيك.

[ام يعقوب]

مشكورين على الرد المهم اني وصلت الرسالة ودمتم للكويت