الخثره

[بن عيسى والنعم]

السلام عليكم ...
اليوم بنسوي خــثره وهي من الأكلات الكويتيه القديمه ما قبل النفط وهي عباره عن مرق سمج وعيش .. عاد الكويتين الأوليين يحبون هالأكله وخصوصاً الشياب والعيايز لأنها تنزرط زراط .

بسم الله بدينا وعلى النبي صلينا
جيلتين عيش مغسول عدل ونقعه بالماي ونخليه على كتر (على جنب)
وبعدين نبدي بالمرق ... انيب زبيديه بس من الحبات الوسط أحلى حق المرق نغسلهم عدل ونفركهم بالملح والكركم وشوي كمون .. ونخليهم على كتر
طبعاً تعرفون طريقة المرقه .. بس ألحين بقولها بشكل سريع
3 بصلات قص نعيم - 4 طماطات قص نعيم - معجون طماط قوطي واحد
لومي أسود مطحون ولوميه وحده عدله بس نقضها - 4فصوص ثوم مدقوق
بهارات سمج وكركم وكمون وزنجبيل طري شويه بس(اضافه من عندي) وكزبره ناشفه مطحونه وقفشتين صباره وطبعاً وملح وماي حق المرقه ...

نحمس البصل والثوم والزنجبيل بشوي ماي لين ينشف ويذوب البصل ، وبعدين الطماط الطري ودهن (السمن أطيب من الزيت وأقصد سمنه نباتي علشان صحتكم وشراينكم ) ... ونحمس لين يذوب الطماط عدل عدل (لاتستعيلون) ، وبعدها نحط البهار ومعجون الطماط (ونحمس )ونحط السمجه أنا ما أحط الراس وهذا على كيفكم (طبعا مغسوله من الكركم والملح) وقطعوها وصلتين إذا تبون أو تخلونها تذوب بالمرق كيفكم .. تقلبووون السمج لين يشرب شوي من الحمسه وتحطون اللوميه المقضوضه وبعدين تحطون العيش المغسول (كل مانقع العيش أكثر صارت الخثره طيبه) وبعدين تصبون الماي عليها يكون مستوى الماي فوق العيش بأربع أصابع ،،تطبخ شوي وتشوفون الماي شوي قصر ،، وبعدين تحطين الصباره المنقوعه بالماي من وقت،،وتملحون المخثره حسب ذوقكم بمكيال الملح ،، وتحطون تحت الجدر حديده وتقصرون عالجوله وتخلون الخـــثره تخدر مو أقل من نصصصص ساعه بس نقلب الجدرعلشان نتأكد ما ايحترق إللي بقاع الجدر.

ملاحظه مهمه جداً: كل ماكانت الحمسه متعوب عليها طلعت الخثره ممتازه ولا تنسون الوقت إللي تخدر فيه الطبخه ،، مايحتاي أقولكم بعد... يلعب دور بالطعم .

وبعدين على كتر أنتي مقطعه البصل جوانح وتقلينه بالدهن لين يصير لونه أدعم - بني (حق الحشو وقت النجاب)

وزهبو الرويد والبقل والجرجير وأجار الطماطه

وبالعافيه إن شاء الله ...

[فحيحيلية أصيلة]

السلام عليكم اخوي بن عيسى والنعم.. اسمح لي احط صورة الخثرة و من صورتها جاية نفس الطريقة الي تفضلت و حطيتها مشكور ...

http://www.qassimy.com/up/users/qassimy/786082_l.jpg

و بالمناسبة الطريقة الي حطيتها حضرتك تشير الى الطريقة الزبيرية بالطبخ>> و الدليل اضافة الزنجبيل>> طبعا ماشالله لا يعلى على الزبيرية في الطبخ و النفس>> انا اعرف وحدة زبيرية تقريبا بكل طبخ لها اضافات ماشالله تنفرد فيها>> مثل الزنجبيل بالطبخ.. و الزعفران بالعصيدة.. و هكذا .

الف شكر اخوي على الموضوع الشيّق .

[بن عيسى والنعم]

مشكوووره على الصوره ... بارك الله فيكم
.. واضافة الزنجبيل هذي جديده مني وليست من الوصفه القديمه ،،

[إشعيبه صباي]

اساتذتي الكرام السلام عليكم
ماشاء الله عليكم هذه الذ اكله عندي بس ملاحظتي انكم ماذكرتوا ان يتم نزع العظام من السمك قبل اضافة الرز؟
وتقبلوا تحياتي.

[بن عيسى والنعم]

الله يبارك فيكم
الزبيدي مو زود فيه شوك ... وما أذكر الأولين قالوا انهم يشيلون الشوك وقت الطباخ أو النجاب !!
عيل شدقولين للي يسوي خثره بالميد !!!؟؟
لا تستغربين ..تراهي عجيبه للي يحوفها عدل .. لكم تحياتي

[فحيحيلية أصيلة]

الله يبارك فيكم
الزبيدي مو زود فيه شوك ... وما أذكر الأولين قالوا انهم يشيلون الشوك وقت الطباخ أو النجاب !!
عيل شدقولين للي يسوي خثره بالميد !!!؟؟
لا تستغربين ..تراهي عجيبه للي يحوفها عدل .. لكم تحياتي

و يبارك فيك اخوي.. انا ما اتوقع هالاكلة بتكون لذيذة مع الميد لسبب>> الميد اعتقد ما يتبهر!!.. و اذا طبخنا اي اكلة فيها سمج لا امبهر ولا طلعت روووووحه بالملح ما اعتقد بتكون اكلة لذيذة.. اغلب الظن بتكون اكلة زفرة :mad:>> و انا كل شي اتحمله ما عدا الزفرة :confused: .

[بن عيسى والنعم]

الخثره شغلها بالزبيدي أطيب
ولكن الميد ما ينقد عليه تراه طيب
ولولا الأذواق لبارت السلع

[فحيحيلية أصيلة]

الخثره شغلها بالزبيدي أطيب
ولكن الميد ما ينقد عليه تراه طيب
ولولا الأذواق لبارت السلع

اخوي بن عيسى.. من وجهة نظري كل اكلة سمج لها سمج معين يناسبها>>يعني>> اذا كانت الاكلة مطبق>> ف الالذ ننقي زبيدي>> لان في غير المنطقي مطبق ميد مثلا.. و المجبوس افضله يكون بسمج الهامور >>لانه خبرك الهامور اكبر و مريح بالنسبة لموضوع الشوك سهل انتزاعه لكبره و وضوحه .. لكن الميد-حبيبك الي ما ينقد عليه على قولتك:D- اكيييييد لذيذ اذا كان مشوي>> و انا بصراحة ما شفته الا مشوي ما شفته باطباق ثانية.. و مرقه السمج لذيييييذة جداااا اذا كانت بسمج الهامور بالذات لا جا لونها غااااامج قريب البني من التمر الهندي و في ناس حطون بداله دبس الرمان.

و تقبل مروري و مشاركتي .

[فتى البارق النجدي]

كلام اشعيبه صباي اهو العدل والصحيح واهو كلام الكويتيين!!!!
يسمونه (عظم السمج) مو (شوك السمج) الشوك بظهرها

[فتى البارق النجدي]

((خصوصاً الشياب والعيايز لأنها تنزلط زلاط))
يبا لا تنزنط ولا تنزلط !!! هذااا مو كلامناا

[إشعيبه صباي]

هلا باخوي فتى البارق النجدي
بعد ترى حنا نقول زراط نزرط اللقمه زراط بدون علاج اي بدون مضغ بس الحين اختلطنا واطلعت كلامات غريبه لكن مفهومه!!!
وطوف لا تدقق الا اذا تبي توضح لهجة اهل الكويت.
مع اطيب تحياتي

[بن عيسى والنعم]

موكل شي أقراه أرد عليه يا فتى البارق النجدي و اشعيبيه صباي ... وأكتفي

[نبصاويه كيوت]

اخووي فتى البارق النجدي الاخ بن عيسى قال تنزرط زراط وهااذي الكلمه الصحيحه الي نقوولها
انت كاتب تنزنط وتنزلط شوووف عدل شنو كاتب !!!! وبعدين علق
وتقبل مرووري بصدر رحب وشكرا

[فتى البارق النجدي]

بن عيسى مو فاضي يرد علينا ويعترف بالغلطه
ويفضى يعدل مشاركته ويصلحها من ينزلط ل ينزرط !!!!
اصلا اناا ناقلها منه يا حلوووين وبين قوسييين كوبي بيست.
على قولتشعيبة صباي مش حندقق أوي ونطوف

[فحيحيلية أصيلة]

الله يهداكم.. الموضوع ما يستاهل كل هالنقاش.. صلوا على النبي و الهون ابرك ما يكون... ترا كل راس الموضوع خثره ، و الله يسامحكم >>>

ضــيــعــتــوا الــخــثــره ، بالـــهــذرة . :D:D

[شرقاوي]

بن عيسى مو فاضي يرد علينا ويعترف بالغلطه
ويفضى يعدل مشاركته ويصلحها من ينزلط ل ينزرط !!!!
اصلا اناا ناقلها منه يا حلوووين وبين قوسييين كوبي بيست.
على قولتشعيبة صباي مش حندقق أوي ونطوف


أخي فتى البارق
كن هين مع أخطاء الآخرين ليكونوا مع أخطائك هينين، وصحح لهم على الخاص ليصححوا لك على الخاص، فالناصح في العلن فاضح.

أخي بن عيسى
موضوع جميل نتمنى وضع مواضيع مماثلة تصف لنا مأكولات المطبخ الكويتي.

تحياتي للجميع

[MR.ANWAR]

ايييييييه من زمان ما طبخنا خثره.

الظاهر بنكلم المدام تسوي لنا خثره علشان نزرطها زراط.....تحياتي

ملاحظه صغيره:
الاخت فحيحيليه اصليه وضعت صوره على انها خثره .
و الصحيح الخثره عند اهل الكويت مثل اليريش شكلاا و لينه حيل

[فحيحيلية أصيلة]

ايييييييه من زمان ما طبخنا خثره.

الظاهر بنكلم المدام تسوي لنا خثره علشان نزرطها زراط.....تحياتي

ملاحظه صغيره:
الاخت فحيحيليه اصليه وضعت صوره على انها خثره .
و الصحيح الخثره عند اهل الكويت مثل اليريش شكلاا و لينه حيل

السلام عليكم اخوي مستر انور... انا للامانة ما ف مرة اكلت الخثره.. بس اعرفها و سامعه عنها من قبل .. ف من وصف الاخ بن عيسى حسيت انها تشبه الصورة>> الي فهمته انه اهو بالنهاية عيش >> لكن يجي لين و خاثر>> و اعتقد لذلك سميت بالخثره ، من كثر ما نقعنا العيش بالماي ، و يمكن زايدين بالطباخ ماي>> فطبعا كون ان الخثره تجي مثل الجريش هذا يعتمد على كمية الماي و الفترة الي نقعنا فيها العيش بالماي قبل طباخه اش كثر؟؟ ..

[اصـيـله]

يعطيك العافيه اخوى على الموضوع اللذيييذ
وصح اهيا اشبهه بالشكل حق الجريش وتنزرط زراط

[بن عيسى والنعم]

أشكر الجميع على المرور على راسي والله ،، أتمنى اجربون طباخ وطعم الخثره وخاصتا لما تعصرون اللووووووووووميه ...
الطعم عجججججججججججججب!!!!!!!!!

[sekarbel]

تحيه للجميع الله يهديك يا بن عيسى اشسويت فينا شهيتنا الخثره لكن لا تنسى الشعم المطفى ( المرق الخاثر) ويكون ملوحته طالعه شوييييه مع امحمر على دبس ويصير لون المحمر اشقر الله ياهو ناطععععععععععععععع .

[كيميائيه]

يم يم يم يوعتني
مشكووور عالطريقه

[ام الثلاث اسوار]

السلام عليكم اخوي بن عيسى والنعم.. اسمح لي احط صورة الخثرة و من صورتها جاية نفس الطريقة الي تفضلت و حطيتها مشكور ...

http://www.qassimy.com/up/users/qassimy/786082_l.jpg

و بالمناسبة الطريقة الي حطيتها حضرتك تشير الى الطريقة الزبيرية بالطبخ>> و الدليل اضافة الزنجبيل>> طبعا ماشالله لا يعلى على الزبيرية في الطبخ و النفس>> انا اعرف وحدة زبيرية تقريبا بكل طبخ لها اضافات ماشالله تنفرد فيها>> مثل الزنجبيل بالطبخ.. و الزعفران بالعصيدة.. و هكذا .

الف شكر اخوي على الموضوع الشيّق .

الصورة تفتح الشهية للاكل

[الحي القبلي]

أنا أعرف الخثره بعد لبن يقول أبوي يشترونه من المعيديات

[كندريه بنت شرق]

ما شاء الله خوش اكله كانت لذيذه من ايد عمتي الله يرحمها
حاولت اظبطها ما قدرت يبيلها ناس خبره 👍
بجرب طريقتك اخوي بوعيسي 😊